مہاتیر محمد نے محی الدین یاسین کے وزیراعظم بننے کو غیرقانونی قرار دے دیا

بہت عجیب ہے کہ 2018 کے الیکشن میں ہارے ہوئے لوگ اب حکومت بنائینگے، ابھی بھی پارلیمنٹ میں اکثریتی ارکان کی حمایت حاصل ہے: سابق ملائشین وزیراعظم کا بیان

کوالالمپور (سنسنی خیز تازہ ترین 1 مارچ 2020) : مہاتیر محمد نے محی الدین یاسین کے وزیراعظم بننے کو غیرقانونی قرار دے دیا۔ اس حوالے سے انکا کہنا ہے کہ بہت عجیب ہے کہ 2018 کے الیکشن میں ہارے ہوئے لوگ اب حکومت بنائینگے، ابھی بھی پارلیمنٹ میں اکثریتی ارکان کی حمایت حاصل ہے۔ انھوں نے کہا کہ بادشاہ کو یہ بتانے کا موقع نہیں ملا کہ ملا محی الدین کے پاس اکثریت نہیں ہے۔

انھوں نے پارلیمنٹ کا اکثریتی اجلاس بلا کر اکثریت کا فیصلہ دینے کی درخواست کردی۔ واضع رہے کہ ملائیشیا کے بادشاہ نے ملک کے اگلے وزیراعظم کیلئے محی الدین یاسین کے نام کا اعلان کر دیا تھا۔اپنے اعلان میں بادشاہ نے کہا تھا کہ ملائیشیا کا وزیراعظم بننے کے لئے محی الدین یاسین کو اکثریت کی حمایت حاصل رہی اور وہ یکم مارچ کو اپنے عہدے کا حلف اٹھائیں گے۔ ماضی میں وزیر داخلہ رہنے والے 72 سالہ محی الدین یاسین کو سابق حکمراں جماعت کی حمایت بھی حاصل تھی۔ مہاتیرمحمد کی جماعت نے بھی اچانک اعلان کیا تھا کہ وہ وزیراعظم کیلئے محی الدین یاسین کی حمایت کریں گے۔ ملائیشیا کے وزیراعظم مہاتیر محمد نے استعفیٰ دے دیا تھا، محی الدین یاسین کو اپوزیشن نیشنل فرنٹ اتحاد اور ملائیشین اسلامی پارٹی کی حمایت بھی حاصل تھی۔

مذکورہ دونوں جماعتوں کے اراکین پارلیمنٹ کی مجموعی تعداد57 ہے اور سب نے محی الدین یاسین کے حق میں ووٹ دیا ہے۔ خیال رہے کہ موجودہ حکمراں اتحاد نے 2018 میں جب حکومت سنبھالی تو یہ طے پایا تھا کہ مہاتیر محمد وزیراعظم کا عہدہ72 سالہ انوار ابراہیم کو سونپیں گے لیکن جب مہاتیر نے عہدہ چھوڑا تو ملائیشیا کے بادشاہ نے رائے شماری کرانے کا اعلان کر دیا تھا۔ ملائیشیا کے گزشتہ عام انتخابات میں مہاتیرمحمد اور ان کے اتحادیوں نے برسراقتدار پارٹی کو شکست دی تھی۔ملائیشین الیکشن کمیشن کے مطابق جیت کے لیے 112 نشستیں درکار تھیں جب کہ مہاتیر محمد اور اتحادی جماعتیں 115نشستیں حاصل کرنے میں کامیاب ہوئیں تھیں۔