پاکستانی کرکٹ ٹیم نمبر 1 ٹی ٹوئنٹی رینکنگ سے محروم ہونے سے بال بال بچ گئی

جنوبی افریقہ کیخلاف ٹی ٹوئنٹی سیریز میں کلین سوئپ نہ کر پانے سے آسٹریلیا پہلی پوزیشن حاصل کرنے سے محروم رہ گیا

لاہور (سنسنی خیز ترین ۔29فروری2020ء) پاکستانی کرکٹ ٹیم نمبر 1 ٹی ٹوئنٹی رینکنگ سے محروم ہونے سے بال بال بچ گئی، جنوبی افریقہ کیخلاف ٹی ٹوئنٹی سیریز میں کلین سوئپ نہ کر پانے سے آسٹریلیا پہلی پوزیشن حاصل کرنے سے محروم رہ گیا۔ تفصیلات کے مطابق پاکستان کی آئی سی سی ٹی ٹوئنٹی رینکنگ میں پہلی پوزیشن بال بال بچی ہے۔ بتایا گیا ہے کہ آسٹریلیا دنیا کی نمبر 1 ٹی ٹوئنٹی ٹیم بنتے بنتے رہ گئی۔

آسٹریلیا کو جنوبی افریقہ کیخلاف ٹی ٹوئنٹی سیریز میں کلین سوئپ کرنا تھا، جس کے بعد وہ پاکستان سے آئی سی سی رینکنگ میں پہلی پوزیشن چھین لیتی۔ تاہم آسٹریلیا سیریز میں کامیابی تو حاصل کر پایا، لیکن کلین سوئپ کرنے میں ناکام ہوا، جو پاکستان کیلئے بہترین نتیجہ ثابت ہوا۔

اس وقت آئی سی سی رینکنگ میں آسٹریلیا اور پاکستان کے درمیان صرف ایک پوائنٹ کا فرق ہے، اور کینگروز کسی بھی وقت پاکستان کی 2 سالہ بادشاہت کا خاتمہ کر سکتے ہیں۔

واضح رہے کہ پاکستان 2 سال سے زائد عرصے سے آئی سی سی ٹی ٹوئنٹی رینکنگ میں پہلی پوزیشن پر براجمان ہے۔ آج تک پاکستان کے علاوہ دنیا کی کوئی دوسری کرکٹ ٹیم اتنے طویل عرصے کیلئے نمبر 1 ٹی ٹوئنٹی ٹیم نہیں رہی۔ تاہم اب خدشہ ہے کہ جلد ہی پاکستان اپنے اس اعزاز سے محروم ہو سکتا ہے۔ گزشتہ ایک سال کے دوران ٹی ٹوئنٹی کرکٹ میں پاکستان کچھ زیادہ اچھی کارکردگی نہیں دکھا پایا، جبکہ نمبر 2 ٹیم آسٹریلیا مسلسل فتوحات حاصل کر رہی ہے۔