کورونا وائرس زیادہ پھیل گیا تو حج بھی متاثر ہوسکتا ہے، صدر مملکت عارف علوی

پشاور: صدر مملکت ڈاکٹر عارف علوی کاکہنا ہے کہ 51 سے زائد ممالک میں کورونا وائرس پھیل چکا ہے اور پاکستان میں بھی پھیلنے کا امکان ہے، کورونا وائرس زیادہ پھیل گیا تو حج بھی متاثر ہوسکتا ہے۔

صدر مملکت ڈاکٹر عارف علوی کا پشاور میں طبی کانفرنس سے خطاب کرتے ہوئے کہنا تھا کہ پاکستان میں صحت کے کافی مسائل ہیں جن میں ہیپاٹائٹس سب سے سنگین ہے، ملک کی 9 فیصد آبادی ہیپاٹائٹس کا شکار ہے ۔

ڈاکٹر عارف علوی کا کہنا تھا کہ ہیپاٹائٹس کے خاتمے کے لیے 3 ارب ڈالر کی ضرورت ہے، کورونا وائرس کے حوالے سے بات کرتے ہوئے کہنا تھا کہ 51 سے زائد ممالک میں کورونا وائرس پھیل چکا ہے۔

انہوں نے کہا کہ کورونا وائرس پاکستان میں بھی پھیلنے کا امکان ہے، لہذا عوام احتیاطی اختیار استعمال کریں جس کے لئے عوام میں آگاہی کی ضرورت ہے۔

صدر مملکت نے کہا کہ کورونا وائرس زیادہ پھیل گیا تو حج بھی متاثر ہوسکتا ہے، ماسک مہنگے ہوگئے تو گھبرانے کی ضرورت نہیں، آپ خود بھی بنا سکتے ہیں ، ٹشو سے ماسک بنانے کی ویڈیو ٹویٹر پر ڈالی ہے، بہادر قومیں مشکلات کا مقابلہ کرتی ہیں۔